الحُــب .. حديثُ العصر !

 احم احم 

بعيدا عن الثقافة اللي مش جايبة همها .. وابعد كمان شوية عن المنطق اللي هو كمان مش جايب همه .. رح احكي عن موضوع رائج بكل معنى الكلمة .. وبالعامية .. ألا وهو .. ترا رااا !!

الحُــب .. L’amour 

يا اخي بتفوت الفيس بتلاقي الفرندز او حتى الجروبز (اه بعرف انجلش) منقسمين الى ثلاثة اقسام كالتالي:
قسم عاشق، قسم يطوق لان يعشق، والقسم الثالث يبكي على الاطلال -ياويلي- .. والمصيبة انو كلو زعلان !!

طبعا الحكي رح يثير سخرية البعض وفكاهة البعض الاخر ... بس ما علينا

مين حضر الفيلم الاجنبي "Shallow Hall" ؟! طيب الفيلم المصري المقلَّد "حبيبي نائماً" ؟!

بالنسبة للي ما حضره باختصار الفيلم بيحكي انه البطل سووو سطحي، وعنده مقاييس للجمال كمان سوو سطحية، وفتاة احلامه لازم تكون طويلة وذات قوام رشيق إلخ إلخ من سمات الجمال الفاتن او الجذاب، لكن اللي بيصير انو احد المقربين لالو بيطلب من ساحر او وات ايفر ينومه مغناطيسيا لحتى يصير يشوف جمال الروح ..- يا عيني-.. ولحسن او لسوء حظه بيقع بحب وحدة فيها من الجمال الخارجي القليل ،، والحلو انو بيكون مقتنع انها حلوة وانها هي فتاة احلامه اللي بيتمناها بعكس الصاحيين اللي مش شايفين فيها ادنى مقاييس الجمال،، المهم بعد ما تقع الفاس بالراس البطل بيصحى وبيشوف الوجه الحقيقي للي بيحبها ،، وبيكون وقتها امام خيارين الاول انو يسيبها والتاني انو يكمل معها والتالت انو يتنوَّم تاني ، بس هو بيختار انو يكمل ويتزوجها كمان -أخ  شو انو شهم- وبيعيشو بسبات ونبات وبصراحة ما بعرف ازا خلفو صبيان وبنات او لأ :$

الفكرة من البرم الذي سبق هو .. انو شو مفهوم الحب ؟ وشو هي المعايير او المقاييس اللي لازم تتوافر في المحبوب لحتى يحصل على الآيزو ؟!

يا ترى هل الاشي متعلق بالطول ؟ ولا بالرشاقة ؟ ولا يمكن بالبشرة البرونزية ؟!! ولا متعلق بالشخصية  والتوافق الفكري ؟ -ما بدنا نقلبها دراما- ..

نرجع لأنكل فيس بوك هو الخبير

لما بنت او شاب اعمارهم ما بتتجاوز ال 15سنة تلاقيهم كاتبين -على سبيل المثال لا الحصر ها- "ما الحب الا للحبيب الاول" -يا ضناية :( - ،، ولما تشترك بجروب ثقافي او على الاقل هيك اسمه بيوحي وتلاقيه بين كل 10 مشاركات مشاركة وحدة بس ثقافية وبتكون ملطوشة ! وباقي المشاركات عن الفراق والاشتياق إلخ إلخ ،، ولما تلاقي كاتب او كاتبة مشان ينتشروا او ينشهروا لازم ينشروا اي اشي انو اي اشي بيتعلق بالحب ولو بأتفه اشكاله وينجحوا بهالاشي ،، ولما يصير الحب نوعين .. حب تبع زمان وحب تبع هالايام ،،
لما الحب يفقد معناه ..
 بيكون في اشي غلط .!

ولا شو ؟!